धनंजय मुंडेंच्या नाथ प्रतिष्ठानकडून हातावर पोट असलेल्या 5000 गरजूंना किराणा वाटप

परळी : कोरोना विषाणूचा प्रादुर्भाव रोखण्यासाठी २१ दिवसांच्या लॉकडाऊनमुळे हातावर पोट असलेल्या कामगार, मजूर, हातरिक्षा चालक, घरकाम करणाऱ्या महिला आदींची मोठी अडचण झाली आहे.

याच्यावर मात करण्यासाठी सामाजिक न्याय मंत्री धनंजय मुंडे यांच्या नाथ प्रतिष्ठानने शहरातील पाच हजार लोकांना २१ दिवस पुरेल एवढे किराणा साहित्य वाटप करण्याचे काम हाती घेतले आहे.

परळीतील गरजू लोकांची यादी बनवण्यात आली असून, कोणालाही यासाठी घराबाहेर जावे लागणार नाही असे नियोजन केले आहे. प्रतिष्ठानच्या वतीने त्यांना घरपोच हे सामान दिले जात आहे. गुरुवार व शुक्रवारी हे काम केले जात आहे.

नगर परिषदेचे गटनेते वाल्मिक कराड, सचिव नितीन कुलकर्णी यांनी यासाठी नियोजन केले आहे. या किटमध्ये प्रामुख्याने तांदूळ, तेल, मीठ, साखर, चहा पावडर, तूरडाळ, चटणी, हळद असे साधारण २१ दिवस पुरेल एवढे किराणा साहित्य आहे.